| |
 Եվրոմիությունը իսպանական 7 ակումբների դեմ գործ է սկսել՝ կասկածելով նրանց պետական օժանդակություն ստանալու մեջ, ինչը արգելվում է ԵՄ օրենքով: Կասկածի տակ են հայտնվել «Ռեալը», «Բարսելոնան», «Օսասունան», «Վալենսիան», «Էլչեն» ու «Հերկուլեսը»: Եվրոհանձնաժողովը ապրիլի 7-ը վերջնաժամկետ է սահմանել, որ ակումբները ներկայացնեն իրենց ֆինանսական փաստաթղթերը: Մեղադրանքները բաժանվում են երեք խմբի. առաջին հերթին, «Ռեալը», «Բարսելոնան», «Օսասունան» ու «Ատլետիկը» հետաքննվում են որպես ակումբներ, որոնք չեն վերածվել բաժնետիրական ընկերությունների, երկրորդ հերթին՝ «Հերկուլեսը», «Վալենսիան» ու «Էլչեն» կասկածվում են պետությունից վարկեր ստանալու մեջ, և երրորդ՝ կասկածի տակ են առնվել «Ռեալի» ու Մադրիդի քաղաքապետարանի միջև պայմանագրերը ակումբին պատկանող հողերի հետ կապված: Առաջին դեպքում խոսքը գնում է «Ռեալի», «Բարսայի», «Ատլետիկի» ու «Օսասունայի» հատուկ կարգավիճակի մասին, ինչի արդյունքում նրանք ավելի քիչ հարկեր են վճարում, քան մյուս ակումբները (21-25% այս ակումբների մոտ, մյուսների համար՝ 30%): Եվրոհանձնաժողովը պահանջել է բացատրել, թե ինչ նպատակով է 118 մլն եվրո պետական գումարներ հատկացվել վարկի տեսքով «Վալենսիային», «Հերկուլեսին» ու «Էլչեին», որոնք այդպես էլ չեն վերադարձվել Իսպանիայի գանձարան: Եվ վերջում, ԵՄ-ին հետաքրքրում է 1998 թվականին «Ռեալին» հողատարածքներ հատկացնելու Մադրիդի քաղաքապետարանի որոշումը: Այդ ընթացքում տվյալ հողատարածքների արժեքը 600 հզ եվրոյից աճել է՝ հասնելով 22,7 մլն եվրոյի:
|
| ||||
1902| 
09:48
