| |
Աշխարհի առաջնության 1/8 եզրափակչի շրջանակներում Գերմանիայի հավաքականը հանդիպեց Ալժիրի հետ: Առաջին կեսում Ալժիրի հավաքականը մի քանի վտանգավոր պահեր ունեցավ, իսկ ահա երկրորդում նախաձեռնությունն անցավ Գերմանիայի հավաքականի կողմը: Ճիշտ է, եվրոպացիներին ոչ մի կերպ չէր հաջողվում գրավել մրցակցի դարպասը, մի քանի դրվագներում հիանալի գործեց ալժիրցիների դարպասապահ Ռաիս Մ'Բոլին: Հիմնական ժամանակն ավարտվեց գոլազուրկ ոչ-ոքիով: Իսկ լրացուցիչ ժամանակի առաջին րոպեներին Տոմաս Մյուլլերի փոխանցումից հետո Անդրե Շյուրլեն վերջապես կարողացավ բացել հաշիվը: Իսկ 119-րդ րոպեին Մեսուտ Օզիլը խփեց երկրորդ գնդակը: Ընդամենը մեկ րոպե անց Աբդելմեմունե Ջեբուն կարողացավ մեկ գոլ հետ բերել, սակայն ավելին անելու ժամանակ պարզապես չէր մնացել: Գերմանիայի հավաքականը հաղթեց 2-1 հաշվով ու դուրս եկավ քառորդ եզրափակիչ, որտեղ կհանդիպի Ֆրանսիայի հավաքականի հետ: Այսպիսով՝ Գերմանիա - Ալժիր 2-1 Գոլերը` Շյուրլե (92), Օզիլ (119) - Ջեբու (121) |