| |
 «Օսասունայի» դեմ խաղից առաջ Կարլո Անչելոտին մամլո ասուլիս տվեց: Իտալացի մասնագետը հաստատեց, որ Բեյլը կլինի մեկնարկային կազմում, իսկ Ալոնսոն չի խաղա, իսկ հետո նա քննարկեց բուն խաղը.«Սեփական հարկի տակ ավելի հարմար է խաղալ, քան արտագնա խաղերում: «Սանտիագո Բեռնաբեուում» հավաքված երկրպագուները միշտ կարևոր են մեզ համար, ու վաղն էլ բացառություն չի լինի, քանի որ խաղալու ենք մի թիմի դեմ, որը մեզ լուրջ դժվարություններ առաջադրեց Լա Լիգայում: Սա կարևոր մրցաշար է, ու մենք պետք է լավ արդյունքի հասնենք ու առաջ անցնենք մրցակցից այս դիմակայությունում, որպեսզի պատասխան խաղից առաջ ճնշում չզգանք մեր վրա»: Առաջիկա շաբաթվա մասին, որի ընթացքում երեք խաղ են անցկացնելու` «Խաղերից հետո մենք ընդամենը մեկ օր ենք ունենում վերականգնման համար: Եթե տեսնեմ, որ որևէ ֆուտբոլիստ լավագույն մարզավիճակում չի, նա չի խաղա, բայց չեմ կարծում, որ շատ փոփոխություններ կլինեն: Թիմը պատրաստվում է ավելի լավ խաղալ: Նախորդ շաբաթն այնքան էլ հաջող չստացվեց, քանի որ Դոհա այցելությունը չօգնեց նախապատրաստվել «Սելտայի» դեմ խաղին: Բայց խաղալն ավելի լավ է, քան մարզում անցկացնելը, քանի որ խաղերի ժամանակ ավելի արագ ես մարզավիճակ ձեռք բերում»: Դի Մարիայի մասին` «Մենք պետք է հավատանք նրա խոսքերին: Նա տվել է իր բացատրությունը: Եթե որևէ մեկը մտածում է, որ դա վատ ժեստ էր, նա ներողություն է խնդրել դրա համար: Նա կենտրոնացած է խաղին, ու չեմ կարծում, որ «Բեռնաբեուում» Անխելը որևէ խնդիր կունենա: Ամեն դեպքում, ես հուսով եմ: Երկրպագուները շատ պահանջկոտ են, բայց նրանք սիրում են իրենց ֆուտբոլիստներին, ու չեմ կարծում, որ վաղը Անխելը որևէ խնդիր կունենա: Երկրպագուները նրան հասկանում են: Միգուցե նա սխալ է թույլ տվել, բայց այս թեման պետք է շուտ փակել, քանի որ առջևում շատ խաղեր կան, իսկ մենք ունենք նրա կարիքը»: Թե արդյոք նա կխաղա «Օսասունայի» դեմ`
«Նա վաղը չի լինի մեկնարկային կազմում, քանի որ ես դաշտ եմ դուրս բերելու ավելի թարմ ֆուտբոլիստների: Նա շատ հանգիստ է: Նա գոհ է, որ «Ռեալի» ֆուտբոլիստ է, ու խաղում է մեծ վստահությամբ: Նա լավ հարաբերություններ ունի մյուս ֆուտբոլիստների հետ ու ցանկանում է լավ մրցաշրջան անցկացնել: Մենք ունենք Գարեթ Բեյլ, ով «Սելտայի» դեմ խաղում մեկնարկային կազմում չէր, ու վաղը նա առաջին րոպեներից դաշտ դուրս կգա»: Խաբի Ալոնսոյի ու ականջի հետ ունեցած խնդիրների մասին` «Նա լավ է մարզվում, ու ամեն ինչ կկարգավորվի: Ֆիզիկապես նա պատրաստ է խաղալ, բայց մենք պետք է հաշվի առնենք, թե ինչպես է ֆուտբոլիստի ինքնազգացողությունը: Նա հիմա իրեն այնքան էլ լավ չի զգում ու այսօր բժշկի հետ հանդիպում պետք է ունենար: Նա հայտավորված չէ վաղվա խաղին»: Մոդրիչի մասին` «Նրա խաղը կատարելագործվել է, ու նա այս պահին շատ հանգիստ է: Նա գիտի, որ մեզ համար կարևոր ֆուտբոլիստ է, ու ես կարծում եմ, որ նա դեռ ավելացնելու տեղ ունի, քանի որ Լուկան շատ տաղանդավոր է»: Կրիշտիանու Ռոնալդուի մասին` «Ֆուտբոլիստի համար նորմալ է պրոֆեսիոնալ լինելը: Կրիշտիանուն հիանալի աշխատանք է կատարում: Նա միշտ պատրաստ է ու մեծ ժամանակ է հատկացնում վերականգնմանը, քանի որ ֆուտբոլիստների համար ամեն ինչ չի սահմանափակվում մարզումներով: Այս առումով նա լավագույններից մեկն է»: Իսկոյի մասին` «Նա այնքան էլ լավ չխաղաց «Սելտայի» դեմ, բայց դա ասելու մեջ ոչ մի վատ բան չեմ տեսնում: Նրա դիրքի ֆուտբոլիստի համար դժվար է շարունակ հիանալի խաղ ցուցադրել: Նա չի կարող 90 րոպե շարունակ բարձր տեմպով խաղալ, քանի որ դա եզրային հարձակվողների որակներից է: Նույնը կարող ենք ասել Ռոնալդուի ու Մեսսիի մասին: Նրանք չունեն այն ֆիզիկական պատրաստվածությունը, ինչը պաշտպանողական ոճի կիսապաշտպանները: Տաղանդավոր ֆուտբոլիստների համար կարևոր է շարունակականությունը: Իսկոն նույնպես մեզ համար կարևոր ֆուտբոլիստ է: Նա շատ երիտասարդ է ու առաջին մրցաշրջանն է անցկացնում «Ռեալի» պես թոփ ակումբում»: Կարվախալի ու Արբելոայի մասին` «Նրանք երկուսն էլ հիանալի աշխատանք են կատարում: Ես պատրաստվում եմ ռոտացիայի դիմել այս դիրքում, քանի որ երկուսն էլ նույն մակարդակի վրա են: Կարևոր է, որ բոլոր ֆուտբոլիստները թարմ լինեն, քանի որ ես մեծ պահանջներ եմ ներկայացնում եզրային պաշտպաններին: Հույս ունեմ, որ Կոենտրաուն կապաքինվի ու հաջորդ շաբաթ կկարողանա խաղալ»: Թե ինչու է թիմը խաղերի ընթացքում երբեմն կորցնում վերահսկումը դրա նկատմամբ` «Դրան բացատրություն դժվար է գտնել: Մենք ունենք հարձակվողական ոճի շատ խաղացողներ, իսկ նման ռիսկը իր հետ բերում է վերահսկման կորուստ: Որոշ պահերի մենք պետք է հաշվի նստենք նման ռիսկի հետ, բայց դա կառավարվող ռիսկ է»: Ձմեռային տրանսֆերային պատուհանի ժամանակ տրանսֆերների հնարավորության մասին` «Որևէ տրանսֆեր չի լինի: Մենք հիանալի կազմ ունենք: Վնասվածքներ չունենք, իսկ Վարանը, հուսով եմ, 15 օրից շարք կվերադառնա»: Եվ վերջում, Լիոնել Մեսսիի մասին` «Դա լավ նորություն է «Բարսելոնայի» ու Լա Լիգայի համար: Մեզ համար դա նշանակում է մրցակցության ուժեղացում, քանի որ Մեսիի հետ «Բարսելոնան» լրիվ այլ թիմ է: Առանց նրա «Բարսելոնան» շատ լավ խաղաց, իսկ հիմա նրա հետ է շարունակելու նույն կերպ: Մենք ցանկանում ենք բարելավել մեր վիճակը մրցաշարային աղյուսակում ու կանենք այդպես, եթե կիրակի օրը հաղթենք, քանի որ կարծում եմ, որ «Ատլետիկո» - «Բարսելոնա» խաղում հաղթողն ի հայտ չի գա»: |
| ||||
1902| 
09:48
